Al cesso al è na costružjon co 'l unico scopo de ndarghe entro par chegar e pissar.
Al pol esser costruì de sass (o matoi) o de legn.
Se al è de legn de solito al à an teler costituì da cuatro pai de legn inpjantadi in tera e qualchedun par stravers, e da na muradura de tole. Al cuert al è spjovente de legn, cop o lamjera. Al à na unica porta de legn.
Se al è de matoi o sass al à na strutura a seti portanti, an paviment de ciment, na porta de legn e na finestrela senža seramento par far passar la luce. Tante olte al è de fianco de na stia o de 'n nantro local de 'l genere. Al cuert al pol esser spjovente de cop, ma le pì trope olte al è pjan de ciment armà. Te 'l secondo caso al gnen cuatà da 'n strato de teren par isolarlo da 'n punto de vista termico.

Ten tuti e doi i casi al à an buss te 'l pavimento de 'l diametro de na trentina de schei aonde ghe se ghe pissa e se ghe chega entro. Sot sto buss pol esserghen na vasca de racolta o na manega che porta fora par al prà.

Na olta par indicar al cesso, se no era tant ciara la so posižjon, inveže che la scrita WC come dess se scrivea sora la porta al numero 100.

In ogni caso al cesso al è senpre an edificio ligà a la presenža de na casa o de na casera, e anca se 'l condivide co sta qua an mur, in ogni caso al accesso al è da 'l esterno.

Al dì de incoi i cessi i è quele stanže che gnen doperade a 'l unico scopo de ndarghe entro a pissar o chegar, e cuasi tuti i è dotadi de 'n lavandin co 'l acua corente. Al posto de 'l buss ghe 'n è na turca o am water e na vascheta par tirar l'acua. la condota fognaria la à da esser a norma de lege.
Te le case inveže ghe n'è i bagni, cioè de le stanže che le serve tant da cesso fa par lavarse in modo paržjal e conpleto.